Special Expenditure Observer Nagaland tongogo

Dimapur, April 1 (TYO): Nagaland atema Special Expenditure Observer D.D. Goel tanü state tonga arur Hotel Japfü, Kohima nung CEO Nagaland, Abhijit Sinha; Commissioner & RO Nagaland, M. Patton; Expenditure Observers aser tangartem den senden ka amen.
Taruba Lok Sabha elections atema Nagaland nung mapa renemba osang pai metetpela aser ECI-i senotsü endoktsü indang telatetbatem agüja aliba osang nenshia metetdaktsü.
Observer D.D. Goel-isa election dak sendakba ketdangertem aser tanga Expenditure Observers dang osang agütsütsü shisem.
Paisa senotsü aser yi amala amshia vote agütsürtem mesütsü merangba onük lemsatep. Iba mapang CEO, state police nodal officer aser Expenditure Observers-i osang metetdaktsü.
Paisa shishilembadak oset kar kanga yokyayokjiba osang metettsü atema bushisüngdangtsü tebilemba ka shidang.
Candidate aser Political Party temi election expenditure tetuyuba alema inyakba azüoktsü aser anema inyaktsü atema c-Vigil App amshitsüba indang Observer Goel-isa metetdaktsü.
Tanü Special Expenditure Observer-i Dimapur tonga aruba sülen 173 CRPF Battalion conference Hall-i ao aser idakji Deputy Commissioner Dimapur, Commissioner Police Dimapur, Director Airport Dimapur, Additional Commissioner Excise, CO 173 CRPF, Income Tax, banks, CISF nung ketdangsertem aser expenditure & monitoring team Dimapur nodal officers den senden ka amen.
Lok Sabha elections mapang ozüng alema sen amshiba mita reprangtsü atema pai tetuyuba agütsü.
Taoba elections mapang Nagaland-i sen bener aruba tatalokbatem ajuruogo anungji private helicopter tem aruba jungjunga mita reprangtsüla, ta paisa shisem.