Special National Integration camp (SNIC) sentong tenzükogo

Dimapur, Jan. 05 (TYO): January 4 nungi tenzüka 14, 2017 tashi amongtsü aliba Special National Integration camp (SNIC), Patkai Christian College (PCC) nung tenzükogo; Iba ya National Cadet Corps pur atema tatem sentong ka ama amonger.
India linük tesem balala nungi cadets 600 sentepa iba camp nung shilem agitsü, North East Region nungi-a cadet 110 densema lir.
Camp indang tongtibang nükjidongji, cadet tem tesem balala nungi, tamangba, oshioben aser sobaliba balala bener sentepba rongnung item telemsa toktsür parnok tsüngda telongjem tanela ka adokdaktsütsü asoshi lir.
Camp nung adenba ajanga maneni tangar sobaliba angazüktsü maongka agutsütsü asoshi lir.
India nunger yimyatem, senotsü nung koda arener aser seven sisters state-tem indang sobaliba otsüren indang tali jangja angatetdaktsütsü asoshi sentong balala agitsü. Item sentongtem ajanga National Cadet Corps cadets tesem balala nungi sentepa aliba tsüngda kati ka tali angatetteptsü asoshi lir.
Item sentongtem den külemi cadet-temi merükmejuba sentong balala nung shilem agitsü.
Sentong balala koba nung Drill, Sports aser trekking amala aika agitsü. Iba dak alaka cadet-tem tasü aittsü aser lokti nung o jembibaren nung tali renloktsü asoshi sobaliba sentong, declamation aser debate sentongtem agitsü.
Item sentongtem nung shilem agiba den külemi tajungertem shimteter pei state aser linük tenüng nung national level nung aser Youth Exchange programs nung shilem agitsü asoshi bendang linüktemi yoktsü.
National Integration Camps 50 rongnung tongtibang camp 6 lir, aser item camp-tem küm shia Port Blair (Andaman Islands), Lakshadweep Islands, Jaisalmer (Rajasthan), Leh/Srinagar (Jammu & Kashmir), New Delhi aser NE nung Nagaland amala kinük nung aliba tesemtem nung amonger. NER Directorate, Shillong tünung nung NCC Group Headquarter, Kohima-i ayonga Patkai Christian (Autonomous)Chumukedima, Dimapur nung SNIC amonger.