Special Olmypics: Ranveer gold agizüker 1 buba India asayar kümogo

Ranveer Singh Saini aser külem asayar, Monica Jajoo nati Special Olympics World Games indang GF Golf-Level 2 Alternate Shot Team Play gold medal agizükba sülen agiba noksa ka yangi angur.  (Los Angeles, August 01)

Los Angeles, August 01 (Agencies): India nunger golf asayar, Ranveer Singh Saini-i US kübok Los Angeles nung ayongba Special Olympics World Games nung gold medal ka agizüka otsü tasen ka yashi, Hokolbar nü yangluogo.
Autism tashidak aketsang, Ranveer-i GF Golf-Level 2 Alternate Shot Team Play shilem nung gold medal agizüka iba otsü tasen ya yanglu.
Arishi küm 14 tain Ranveer-i külem asayar, Monica Jajoo den lungjemer tanabuba jenjang nung alir Hong Kong aser Japan telok den shots 9 agi temaba jenjang ngua takokbaji agizük.
GF Golf-Level 2 Alternate Shot Team Play asaya nung linük 21-i shilem agia liasü.
“Ozü jabaso, Ranveer ama tangar memenepba chirnur alir tsürapur ajungai pei chirnur dak tamang akatsü ajungshir kechiyong Tsüngremi parnok nem sempet jenti agüja lir,” ta Ranveer tebui metetdaktsü.
Ranveer-i küm 2 tejaklena Asia Pacific World Games nung gold medal 2 tashi agizüka Asia Pacific gold medal agizüker mezüngbuba India nunger golf asayar küma otsü yangluba osang bushiteta lir.
Ravneer arishi küm 2 abensaba jakdang pa dak autism tashidak keta aliba putet saka pai temulungtetba tulu yur tangar den jenjang tajungba ngua golf asayaba yong pa tenüng Limca Book of Records tashi nung zülusema lir.