Special Task Force-i Kolkata nung ano ISI Agent ka puogo

Kolkata, December 02 (Agencies): Tanü Bodhbar nü Special Task Force (STF)-i Kolkata yimti tiyonglen temelung melemi ISI atema inyaker ka puogo.

Anogo asem tejaklen-a parnoki Kolkata nung Pakistan intelligence agency, ISI atema inyaker ana pua liasü.

Osang ka lazükba sülen tanü nikongdang 2:30 meta arishi küm 59 tain, Sheikh Badal central business district, Regional Passport office kimalen Brabourne Road nung apu, ta senior STF ketdangser kati osangbenertem dang ashi.

Badal anema Indian Penal Code section 120B, 121, 121A, 489B aser 489C tem kübok ken o benokogo.

Taoba Deobar nü Kolkata Police, STF unit-i Garden Reach Shipbuilders & Engineers Limited (GRSE) nung contract aayanger ka tenüng agi Irshad Ansari, par jabaso Asfaq Ansari aser kinünger Mohammed Jahan nunger pua liasü. Parnok ajaki ISI agent ama shilem agia lir.

Taoba Hokolbar nüa Uttar Pradesh nung Pakistani intelligence agency ISI atema inyaker Mohammad Ejaz pua liasü.

Islamabad nung alir Ejaz ya Delhi-i aoba mapang Meerut Cantt tesem nung apu.

Tan ita tetenzüklen-a Kolkata STF-i ISI agent tem ta melung melemi Kolkata nung Akhtar Khan aser pa adianu Zafar Khan na pua liasü.