Spectre film ajanga Guinness World Record angu

Los Angeles, November 10 (Agencies): 24 buba James Bond film, Spectre-i Largest Film Stunt Explosion shilem indang Guinness World Record tanü Mongolbar nü nguogo.
Spectre film producer, Barbara Broccoli aser kasa film nung tongti shilem agir, Daniel Craig aser Lea Seydoux nungeri Chris Corbould tenüng nung Guinness World Record kulikaket agizükba osang jangjaogo.
Taoba mapang Academy Award sempet agizüker, Corbould-i Spectre film nung Special Effects & Miniature Effects Supervisor ama tongti shilem agia, tan otsü tasen ya yanglu.
Tan renemba pokshitsü shilemji Spectre film indang tongti shilem ka lir aser iba ya June 29, 2015 nü Morocco kübok Erfoud nung totzü litre 8,8418 aser pokshitsü oset seret 33 taret amshia renem.
“Corbould-i Spectre film nung tongti shilem agia, pokshitsü shilem tulutiba renema film yangluba otsü tasen yangluba ajiteta Guinness World Records-i pa nem tetushi agütsüba atema kanga pelar,” ta Spectre film producer, Michael G. Wilson aser Broccoli natia metetdaktsü.
“James Bond film-tem nung film yanglutsüren arrtsü adenba otsü jenti lir. Tesüsaba Bond film, Spectre nunga tanga film-tem nung tangoka meyangluba shilem tasen aika renema lir,” ta Guinness World Records Editor-in-Chief, Craig Glenday-i metetdatksü.
2017 küm nungi tenzüka Largest Film Stunt Explosion shilem ya Guinness World Records nung teti asoshi inoksemtsü sentong renema lir.
Albert R. Broccoli’er EON Productions, Metro-Goldwyn-Mayer Studios aser Sony Pictures Entertainment nungeri külemi lungjemer yangluba Spectre film ya China nung tan hopta tatemlen sayutsü sentong lir.