‘Spectre’ film India nung Nov. 20 nü sayatsü

September 05, 2015: Nüburtemi kanga yongyaseta aliba ‘Spectre’ film India nung taküm November 6 nü sayatsü mapang atsünglanga November 20 nü ang sayatsü, ta jangjaogo.

Iba ya James Bond movie 24buba lir aser director Sam Mendes-i Skyfall film sülen tan mezüng aser pa asoshi Bond film tanabuba direct asürba lir, aser Daniel Craig asoshi 007 film pezübuba lir.

Iba film tasenba nung Bond-i tesüiba mapang indang ‘cryptic message’ ka ajanga tuyuba nung ajemdaker Mexico yimti nung oa maparen kar tenzüker. Mexico nungi pa Rome-i oa ozüng alema benshir ka kinüngtsü asüba, amitsür tobur tajung Lucia (Monica Bellucci) den ajuruteper.

Pai senden ka nung miema shilem agiba sülen Spectre telok inyakyim meteta akümer aser iba nung yariteptsü asoshi White’er jala Madeleine Swann bushitsü Moneypenny aser Q na dang teyari meshir, kechiba süra pai Spectre inyakyim ajak Madeleine Swann-i meteta lir, ta temulung melemi bilemer.

Pai Spectre inyakyim telung tonga ia metet tashi nung Oscar anaben angusang Christoph Waltz-i shilem agiba, pai bushiba tsükchir, den pa tesendaktep tuluka aliba jangja akümer.

Iba film nung Craig, Waltz aser Bellucci nunger den külemi France tsür actress Lea Seydoux, Andrew Scott, Ralph Fiennes, Naomie Harris, Ben Whishaw aser Jesper Christensen nungeria shilem agia lir.