‘Spectre’ film sayaba VIP rongnung William, Kate nunger lir

London, September 20: James Bond film tasenba ‘SPECTRE’ October 26 nü London nung sayaba mapang kanga tongti tejaokertem aika alitsü, item rongnung British Chubar kibong nungi züngsem aika alitsü.
Albert R Broccoli’er EON Productions, Metro-Goldwyn-Mayer Studios aser Sony Pictures Entertainment temi Bodhbar nü sangdong ka ajanga, 24 buba James Bond adventure film ya ‘CTBF’s Royal Film Performance 2015’ atema shimogo, ta ashi.
Iba film tasenba nung shilem agirtem ajak- Daniel Craig, Christoph Waltz, Lea Seydoux, Ben Whishaw, Naomie Harris, David Bautista, Monica Bellucci aser Ralph Fiennes nungera ‘The Royal Albert Hall’ nung film sayaba sentong nung adentsü.
Iba film sayaba sentong nung Chubar kibong nungi Queen Elizabeth II, Prince William, Kate Middleton aser Prince Harry nungera adentsü.
CTBF Royal Film Performance ya küm shia akar, aser iba ya Cinema and Television Benevolent Fund (CTBF) tenla atema akar.
Iba sentong nungsa film nung shilem agirtem dak alia director Sam Mendes, producers Michael G. Wilson aser Barbara Broccoli na aser CTBF ketdangsertemia red carpet nung shilem agitsü.
“Chubar kibong nungi Duke aser Duchess of Cambridge aser Prince Harry nungera royal film performance nung adentsü asüba yong onok kanga pelar,” ta sangdong ka ajanga film producer temi ashi.
Kasa aonungjisa SPECTRE film ya Britain aser Ireland cinema hall tem nunga sayatsü. Iba film ya India nungbo November 20 nü ang sayatsü.