SpiceJet-i seat 100,000 nung sen ajemer ayoktsü

New Delhi, August 20 (Agencies): Taküm aruya aliba benjung mapang tem nung raliwalirtem atsütsü nükjidong nung Brihostibar nü SpiceJet-i anogo asem nü asoshi ticket jenjang sen tajemba agi ayoktsü lapoktsüogo. Iba mapang ainlen jajartemi seat 100,000 dak tema sen ajemer alitettsü maongka agutsü. Iba sentong mapang ticket jenjang saru medeni, tajemba agi sen 799 aser timtiba agi sen 2,699 agi ayoktsü.

“Onok airline ajanga senzüsenpongertem tesüiba mapang dang nungi tang sen tajemba intokdaktsür ta ajaki meteta lir aser ibaji ajanga passenger aika onok meyong tayimtsü nung jajar,” ta SpiceJet nung Tatong Tir aser sales & distribution nung tekolakba Shilpa Bhatia-i ashi.

Tan latetba sentong ajanga Delhi-Mumbai mesüra Mumbai-Chennai-i khen aotsü atema ticket ka nung saru medeni, sen 1,899 asütsü. Ibai saru enokerbo sen 2,999 akümtsü. Kasaji Mumbai-Kolkata-i khen aotsü asoshi ticket saru enoker sen 3,799 asütsü.

Airline-i saru medeni ticket ka jenjang tajemba agi sen 799 asütsü ta ashibaji, Delhi-Chandigarh, Mumbai-Goa, Bengaluru-Kochi, Madurai-Chennai, Jammu-Srinagar aser Kolkata-Agartala tesemtem nung jajatsü purtem asoshi lir.

Iba scheme ya August 20 nungi August 22 ayaterem tashi lapoka alitsü aser iba mapang August 25, 2015 nungi March 26, 2016 tashi jajatsü aliba ticket tem alitettsü.

Iba den yaritepa ano SpiceJet-i Apples iOS mobile App aser Android ajanga aliba ticket tem nung tan ajemer aliba jejang dang nungi tera agi tajemba agi ayoktsü.

Aji oda süaka iba mapang aliba ticket temji khen aliba sülen memelenteptettsü, saru aser fees ang meyiptsütsü, ta SpiceJet-i metetdaktsüogo.