SpiceJet-i sen USD 11 billion jenjang Boeing tayimtsü 100 alitsü

New Delhi, January 14 (Agencies): SpiceJet Ltd ajanga Boeing Co., nungi Boeing 737 Max tayimtsü 100 alitsü asoshi order süogo aser iba jenjang USD 11 billion lir. SpiceJet tayimtsü timba aser totzü aliba nung sen ishiba entoktsü asoshi iba tayimtsütem ya alir, ta SpiceJet Ltd ajanga osang sangdong.
Tayimtsü 100 alizükba sülen ano maneni 737 Max tayimtsü ya 50 alitsü tebilemba lir, ta SpiceJet Ltd nung ketdangsertemi metetdaktsü.
Taoba mapang tayimtsü 55 alitsü asoshi order asüba ajak meyokteper SpiceJet-i Boeing Company dang tayimtsü alitsü aliba ajak aki 205 asütsü. Item rongnungi tayimtsü 155 po 2018 aser 2024 tsüngta agütsütsü.
SpiceJet indang tayimtsü teimba kümdaktsütsü asoshi tayimtsü kar taküm bener arutsü. Demonetisation liaka, November aser December quarter mapang SpiceJet nung tajangzük tulu liasü, ta SpiceJet Chairman, Ajay Singh-i metetdaktsü.
Max tayimtsü aliba ajanga totzü aliba sen shilem 20 anüngzüktsü imlar. SpiceJet ajanga Delhi nung pilot training angazükba tesem amenoktsü asoshi sentong tenzükogo, ta Singh-i maneni ashi.
SpiceJet ya sen-otsü mechi shibangtsü aliba mapang ka nung Ajay Singh-i 2014 küm iba mapa agizüka liasü.
Taoba mapang iba tayimtsü nung anogo ka nung sen crore asem tashi takoksa alua liasü, saka küm ana nung anogoshia sen crore ka-ka aazüker, ta Singh-i metetdaktsü.
Kingfisher Airlines Ltd shibangtsüba sülen tanabuba airline shibangtsü asoshi sorkar temolung agi makizükteti kanga yaritepa iba SpiceJet Airlines ya shishilempbaba nung shilem 7 nungi 13 tongogo.