Sponsor tongti anati FIFA nung temelenshi akhanger

Miami, July 18 (Agencies): Hokolbar nü FIFA sponsor asür tongti anati FIFA aser World Cup tournament nung tongtibang temelenshi benoktsü asoshi ola adoka khangogo.
Coca-Cola Co aser McDonald`s Corp napronglai, FIFA inyakyim nung mepelar aser tongtibang temelenshi nüngdaka lir ta metetdaktsüogo.
Hombar nü FIFA executive committee senden amentsü lia aser küm 17 tashi FIFA Tir inyaka arur Sepp Blatter melena nübo tasen shimtsü atema benoka jembitsü mapang ka nung tongti sponsor anati FIFA nung temelenshi tulu nüngdaker sangdongogo.
Joko küm aika FIFA nung ochimashibaren aliba osangkakettem nung adoker.
Taküm May ita nung US okatsürtemi FIFA football ketdangser nisung 9 aitsüogo, parnok timbaka FIFA nung menden lir, iba den marketing & broadcasting company nung executive züngsem pongubo süpokrem agiba ken o dak sendaka lir.
Hokolbar nü Coca-Cola otongdar tetsür kati, “Onoki FIFA dangi shidi züluogo aser parnok dang temelenshi asoshi independent third-party commission ka pusemang ta shiogo,” ta metetdaktsü.
Ano McDonald otongdar katia, “FIFA telung nung temelenshi aika nüngdaka lir. Rongdak süa melenshitsü asoshi independent commission ka ama nüngdaka lir,” ta ashi.