Sporting Goa-i 5-2 agi Shillong Lajong madak takok angu

Margao, April 10 (Agencies) : Deobarnü Fatorda Stadium, Goa nung tang tasayadak Hero I-League football asayamung nung Sporting Clube De Goa-i kanga mela mela Shillong Lajong FC madak 5-2 agi takok nguogo.
Iba takok ya ajanga Sporting Clube De Goa telok-i game 14 asayaba nung point 18 nguteta pezübuba jenjangi tuogo aser Shillong Lajong FC telokbo trokbuba jenjang nungi marakzüi lir.
Asaya tenzüker minute anabuba nung Goa team nungi Rowlin Borges-i free kick ka metsüba Mehrajuddin Waddoo-i tekolak agi tongokja mezüng goal yok.
Goal kanga kara achiba ajanga Shillong team kanga aoksa aser Brazil nunger ana, Fabio aser Uilliams nati goal yoktsü kanga meranga liasü.
Kobi meli ano Sporting telok nungi Sumit Passi-i goal ka yok. Ibaji asaya tenzüker minute 21buba nung liasü.
Minute 29buba nung Uilliams Souza yellow card ana tashi anguba ajanga asaya nungi tugodaktsüba sülen Shillong Lajong telok atema tensa tamajungba aküm.
Shillong telok asayar 10 ang kümer minute asem buba nung aser asaya tenzüker minute 32buba nung ano Passi-i pa atema goal anabuba yok aser ibaji ajanga 3-0 aküm.
Tatsü ka lir minute 65buba nung Subhashish Bose-ia sporting telok atema goal ka yok.
Tia ka Lajong telok nungi Penn Orji-i minute 77buba nung par telok atema tetsüng tabelen agi goal ka yok.
Iba sülen ano Orji-isa minute 88buba nung pa atema goal tanabuba yok.
Ajisüaka refree-i minute 89buba nung Sporting telok nem penalty ka metsütsü maongka agütsü aser Mahmoud Al Amenah-i aibelen mesüi ibaji goal kümdaktsüba ajanga Shillong telok teimla ajak sama aser iba asaya 5-2 nung tembang.