Sports Arbitration okadaki Platini onük magizüker

Lausanne, December 11 (Agencies): Switzerland kübok Lausanne yimti nung tentetba Court to Arbitration for Sport (CAS)-i tarutsü mapang FIFA Tir menden abentsü terenemshiba agia alisang, Michel Platini-i pa nem agütsüba terenemshi agientsü asoshi benokba onük magizüktsü o bendang tanü Hokolbar nü agütsüogo.
Football asayatsüren nung anogo 90 tashi shilem magitsü tenokdangba ka FIFA-i Platini nem agüja lir.
Platini-i iba terenemshiji agientsü asoshi onük benok saka obendanger 3 densemba CAS mendeni iba onüki magizüktsü lemtetogo.
“Anogo 90 tashi football asayatsüren nung shilem magitsü temerenshi agütsüba ajanga Platini-i tarutsü mapang tetsükdakba kecha majurutsü,” ta shia, CAS obendangertemi FIFA-i agütsüba temerenshiji maneni nungitsü renemba osang sangoktsü.
Platini-i tan Honibar nü Paris nung agitsü ayongba 2016 European Championships draw sentong nung shilem agitsü aser sangküm February ita 26 nü agitsü renemba FIFA Tir election nung candidate ka ama toktepa shilem agitsü atema nüboyimtsü mapatong tenzüktsü nükjidong nung pa nem agütsüba terenemshi agientsü onük benokba osang jangjaogo.
Sepp Blatter-i FIFA Tir menden abendang, 2011 küm Platini-i FIFA sen million 2 tashi agizüka agiba nung ajemdaker pa anema tang okadak ken o benoka lir.
FIFA ethics luden-i Platini den sentakba ken o ji Zurich yimti nung taruba Hokolbar nü angadangtsü anogo lateta lir.