Sports Leadership School nung NE state 6 agi shilem agitsü

Kohima, Metsüremi/March 08, 2022 (TYO):  GETHEMGO Sports International and Sports Coalition of India den longjemer anogo 10 tashi ayonga agitsü renemba Sports Leadership School ya Hombarnü (07.03.2022) KABA Jubilee Memorial Centre, Lerie, Kohima nung tenzükogo. Iba sentong ya  “Building Church Sports Leaders” omen nung ajemdaker agitsü, ta sangdong ka ajanga metetdaktsü.

Sports Leadership School sentong atema North East kübok state trok – Assam, Arunachal Pradesh, Manipur, Meghalaya, Nagaland aser Tripura nungi Arogo lennirtem, Missionary tem aser saisapong wadang balala nungi asayatem Kohima nung adenshia lir.

Iba sentong lapokba sentong nung, Project Director of Task Force for Music and Arts (TaFMA) Nagaland, Dr Hovithal Sothu-i, lennirtem dang anibelem arema inyaktsü ajungshia liasü.

Pai ashiba agi, lennir tajung ka akümtsü asoshi nükla tejangja alitsüla. Telok tsüngda tangatetep nung inyaktsü aser züngsemtem ajungmesotsü atema telongjem alitsü nüngdaker.

Timtem mesüra tenokdangba balala liaka, pei dak temulungtetba tulu yur inyaktsüla, ta pai ajungshi.

Church Sports and Recreational Ministries, America nungi Jonathan Detweiler aser GSI Director Dr Viposa Kiso napronglai iba sentong nung jembiogo.

Iba sentong nung Peraciezie Baptist Church Kohima, Pastor, Dr Kevichalie Metha menden liasü. GethemGo Sports Society,  Chairman Hoshika Swu-i telok pela agizükba o jembi.

Iba training mapang, servant leadership, Laishiba azüngba, Sarasdemba, Asayaba, Jembiba aser Saisapong asayamung yimyatem nung session balala agitsü. Iba sentong ya March 16, 2022 nü tembangtsü, ta kasa sangdong ajanga ashi.