Sports Minister-i Fit India Mobile App amenoktsüogo

Luroi/August 29, 2021 (Agencies): Fit India Movement tenüker kümnabuba nung Sports Minister Anurag Thakur-i Deobarnü Fit India mobile app amenoktsüogo. Iba app ya trainer-cum-fitness guide ka lir.

Thakur-i, iba app ya National Sports Day nü India nungertem atema sorkar sempet lir, ta ashi. National Sports Day ya nüngtugu hockey asayar Major Dhyan Chand asoba anogo nüngtem nung amunger.

“Fit India app ya Major Dhyan Chand nem aküm tetushi agütsüba ka lir, shiba linük nung asayartem atema nükrangtong lir,” ta Major Dhyan Chand National Stadium nung sentong ka ayongzüka agiba mapang Thakur-i ashi.

Iba sentong nung Tokyo Olympics nung bronze medal ngur aliba hockey team captain Manpreet Singh-ia virtually shilem agia liasü.

“Temang anema alitsü atema asayartem ajak atema iba app ya tenüngdaktsü aser iba app sülen anidaktsü imlar. Iba app ya India nunger lanurtem anema toktsütsü atema lir, kechiyong anema aliba lanurtemi India temaba jenjangi ajungkettsü,” ta pai ashi.

“Asenoki fitness ya kanga tongibangsa magir. Asenoki fitness atema anogo nung ghonda tesadang ka dang mapang intoktsü nüngdaker. Iba app ya jangrademtsüka aser angati dang aser ajaki mashi tesem ka nung parnok indang fitness asadangtetsü aser tendangtettsü,” ta paisa ashi.

Hockey captain Manpreet-ia iba app amshitsü ayongzükogo.

“Iba app ajanga teyari tulu agütsütsü aser amshitsüa kanga temela. Nibo amshi tenzükogo aser iba ajanga kü fitness tali tajungba kümdaktsütsü imlar,” ta pai ashi.

Iba sentong nung Minister of State for Sports Nisith Pramanik, Sports Secretary Ravi Mittal, Sports Authority of India Director General Sandeep Pradhan aser tanga ketdangsürtemi shilem agia liasü.