Sports Minister-i Rohtak nung National Youth Festival lapoktsü

New Delhi, January 12 (Agencies): Haryana nung aliba Rohtak tesem nung, “Youth for Digital India” omen nung ajemdaker 21 Buba National Youth Festival, Union Sports Minister Vijay Goel-i lapokja liasü.
Iba anogo pezünü agitsü aliba sentong nung Prime Minister Narendra Modi-i video conference ajanga iba sentong nung adener den jembia liasü. Iba sentong nung Haryana Chief Minister Manohar Lal, Haryana Sports Minister Anil Vij aser tongtibang nisung aika arua aden.
“Vivekanand taküm aser pa tesayuba ajanga linük nung lanur aika taküm melenshitsür, aser ibayongji 1985 nungi tenzüka India sorkari pa asoba anogo nung National Youth Day amunger,” ta Goel-i iba sentong nung jemdidang shia liasü.
“India sorkari Digitalisation aser Skill Development sentong balala inyakba aser PM indang ‘Youth Led Development’ nükla den putepa iba benjong omen nung ajemdaker amunger,” ta pai shia liasü.
Sen 500 aser 1000 senpaktemanentsüba indang jembidang, ochimeshii bendenba sen, kiralongrar yariba aser sen taila amshiba anentsüstü asoshi iba sentong renem aser linük nung lanurtemi digital ajanga sen-o-tsüren amshiba agi India ya teka nung sen bulua mamshiba lokti ka akümba nung shilem tulu agitettsü, ta Union Sports Minister-i lanurtem ayongzüka liasü.
Iba benjung nung State aser Union Territory balala nungi lanur 5000 dak temai sentong balala nung shilem agidar.