Sports Ministry-i Saina o Gowda na nem senotsü teyari agütsür

New Delhi, August 21 (Agencies): India Sports Ministry-i tetsür badminton asayar World No. 1, Saina Nehwal aser discus aoner Vikas Gowda na den külemi, Indian wrestling team nem senotsü teyari agütsütsü renemba osang ka tanü Hokolbar nü metetdaktsüogo.
Tanü agütsütsü nangzükba teyari senji National Sports Development Fund (NSDF) senpong nungi agiteter agütsütsü asoshi renema lir.
Saina’er personal coach, U. Vimal Kumar nem ita shi sen lakh 1 agütsütsü nangzükba den külemi, June 2015 nungi August 2016 tsüngda, ita 15 tashi Saina-i 2016 Rio Olympics atema terenemshiba agibaren nung yaria la nem gym nung amshitsü osettsüset alizüktsü atema sen 10,81,000 agütsütsü asoshi ministry-i nangzükogo.
2016 Olympics Brazil kübok Rio de Janeiro yimti nung taruba küm August ita 5-21 nü tashi asayatsü ayonga lir.
Gowda nema ita 19 tashi lokteper teyari sen croe 1.12 agütsütsü asoshi ministry-isa nangzükogo.
Target Olympic Podium (TOP) mapatong kübok December 2014 nungi August 2015 aser November 2015 nungi August 2016 na densema shilem ana küma lemsar külen Gowda nem iba teyari senji agütsütsü renema lir.
TOP mapatong küboksa densemdakja India’er melangteper telok US-i August-September ita na yoka idakji terenemshiba agidaktsütsü aser tetoktepba nunga shilem agidaktsütsü nükjidong nung parnok nema teyari sen lakh 28.8 agütsütsü asoshi ministry-i renemogo.
India’er melangteper 7 den terenemshiba agia melangteper 7 aser ketdangser 3 tashi US-i yoktsü asoshi Wrestling Federation of India (WFI)-i tang shimteta lir.