‘Spy Drone’ onük nung Pakistan-i India ketdangser jaok

Islamabad, July 16 (Agencies): India nunger indang nisung mamenba ‘itangitba’ tayimtsü kati temzüng alema litsü telungi aita Line of Control (LoC) anasa anüngleni nungi noksa agiogo ta aija Pakistan-i Islamabad nung Foreign Office, Indian envoy jaok.

Tanü High commissioner T C A Raghavan Foreign Office-i jaoka liasü, ta Indian mission ketdangser kati ashi.

Pakistan-occupied Kashmir (PoK), Line of Control anasa Bhiber nung “Indian spy drone” ka kahzüka yokogo, ta Bodhbar nü Pakistan-i metetdakja liasü.

Pakistan sepai sangdong ka ajanga ashiba agi, iba tayimtsü jagi Pakistan nunger airspace aser arrtsü temzüng alema inyakogo.

“Nisung memeni itangitba tayimtsüji anünglen nungi noksa tangoktsü atema amshi,” ta kasa sangdong ajanga ashi.

Ajisüaka Indian Army aser Air Force-ibo iba tayimtsüji parnok meyong masü aser LoC nung parnok indang tayimtsü metsükok mesüra kahzüka meyok, ta shiogo.

“PoK nung nisung mamenba tayimtsü ka tsükokba osang lir. Indian Army meyong nisung mamenba tayimtsü mesüra UAV kata metsükok,” ta army ketdangser kati ashi.

Mongintemi ashiba agi, iba tayimtsüji anünglen nungi video agitsü asoshi yokogo, aser iba tayimtsü nungji sepaitem indang miim osang asoshi technology maliasü.

International Defence Review Unmanned Systems yimobolem zülur, Huw Williams-i, Pakistan nunger military noksa nung adokba tayimtsüji China nungeri yangluba DJI Phantom 3 mesüker, ta shiogo.