Sri Lanka-i India nunger angopur 16 chioktsü

Colombo, September 13 (Agencies): Sri Lanka Ato Kilonser Ranil Wickremesinghe-i India semdangba nüngtem nung India nunger angopur 16 chioktsü osang angshiogo.
Ranil-i taoba ita election nung takok anguba sülen tan mezüng tanga linük semdangerba lir.
Tamil Nadu nunger angopurtem ya Ranil Wickremesinghe, India-i marudangsa, tanü nungi tenzüka chioktsü, ta Ato Kilonser office sangdong ka ajanga metetdaktsüogo.
Ashiba agi, Tamil Nadu nung angopur tentet telungjemi Sri Lanka sorkar dang pua alir angopurtem temang timtem aliba nung tebilemdang kadaktsünüa temepishi ka agüja liasü.
Arishi küm 66 tain, Wickremesinghe-i anogo asem agia India semdangtsü aser iba ya pai taküm January ita election nung takok ngur, Mahinda Rajapaksa atsüngdoker Ato Kilonser akümba sülen tanga linük semdangba mezüngbuba asütsü.
Wickremesinghe-i India Ato Kilonser Narendra Modi, External Affairs Minister Sushma Swaraj aser Tir Pranab Mukhrjee nunger den sensaksem akatsü sentong lir.
Sensaksem mapang angopur tebilemtsü atema jembisemtsü tebilemba lir.
India aser Sri Lanka nungi angopurtem mapang shia tzü arrtsü alema ia ango apuba atema pua ayur.
Aji oda süaka, amalitep tajung sayutsü mechi nung linük ana official süa semdangtepba mapang linük ana pronglai angopurtem chioker.