Sri Lanka-i India nunger angopur 86 chioktsü

Chennai, October 25 (Agencies): Tesüiba ita ana tsüngda Sri Lanka Navy temi Tamil Nadu nunger angopur 86 tashi pua liasü, aser parnok ajak October 28 nü chioktsü, ta tanü state sorkari ashi.
Tamil Nadu sorkarisa, kasa anogo nung state sorkaria Sri Lanka nunger angopur ana chioktsü, ta ashi.
“October 28 nü Sri Lanka-i Tamil Nadu nunger angopur 86 chioktsü ta Union sorkari metetdaktsüogo,” ta state sorkar sangdong ka ajanga ashi.
Parnok meyipa anir arutsü atema mera ajak agitsü state Chief Minister Jayalalithaa-i tuyuogo.
Angopurtem chioktsü sangdongba ya Jayalalithaa-i tanen makai meranga inyakba ajanga lir, ta kasa sangdong ajangasa ashi.
Tamil Nadu nunger angopurtemji Nagapattinam, Pudukottai, Tuticorin aser Ramanathapuram district tem nungi lir, aser parnokji taküm September 22 aser October 14 tsüngda apuba sülen Sri lanka nung aliba tepouktak balala nung puoka liasü.
“Palk Bay aser Gulf of Mannar nung parnok indang ango apuba tesemtem nung ango apudang parnok pudakja liasü,” ta kasa sandong ajanga ashi.
Iba sülen Jayalalithaa-i angopurtem chioktsü atema Centre sorkar den meranga jembia liasü. Angopurtem chioktsü atema Sri Lanka den temaba level nung jembitsü atema lai Ato kilonser Narendra Modi dang shidi ajanga aiben mepishia liasü.