Sri Lanka-i tongpang raradang aibelenba metongshitsü ajungshir: Ban

Colombo, September 02 (Agencies): Sri Lanka linüki Tamil sorkar anemer den tongpang raradang ozüng alema aibelena inyakba maparen metongshitsü tajungshiba olen ka United Nations (UN) Secretary General, Ban Ki-moon-i tanü, Hokolbar nü metetdaktsüogo.
“Tashiyim agi ali lushi agiba, mitkar züngsemtemi tashiyim inyakba aser okadaki aibelena o bendang agütsüba densema, Sri Lanka-i Liberation Tigers of Tamil Eelam (LTTE) sorkar anemer den küm 26 tashi tongpang raradang aibelenba metongshitsü ajungshir,” ta Ban-i ashi.
“Tir Maithripala Sirisena aser pai aniba Sri Lanka sorkari yaküm, 2015 küm nungi tenzüka yimsüsütsü tashi benokba sülen tanü tashi nung LTTE den tongpang raradang mitkartemi nübur temeten anema inyakba metongshitsütsü maparen takok ngua inyakba atema pelar,” ta anogo 3 agia Sri Lanka semdangsang, Ban-i metetdaktsü.
“Ajisüaka, sorkari tesüiba mapang aibelenba ajanga takoksa bener arutsür nisungtem indang ola angatsü aser parnok taküm jenjang tajungba kümdaktsütsü maparen inyaktsü nungdaka lir,” ta pai shisem.
Ban-i Sri Lanka tonga aoba jakdang taoba Sri Lanka Tir, Mahinda Rajapaksa yimsüsütsü menden nungi tashiyim agi atsüngdoker nationalist züngsemtemi yashi, Brehostibar nü longkak aita Ban-i par linük mesemdangtsü aser par Sri Lanka-i LTTE telok den tongpang raradang ozüng alema inyakba den sentakba bushisüngdang magitsü takhangba benokba osang jangjaogo.
Rajapaksa-i aniba sorkari LTTE telok 2009 küm meshimeshia samatsü saka Sri Lanka mitkartemi LTTE den raraba tongpang tatemlen ozüng alema inyaka, tai maketba Tamil nübur meyirijang jenti tepset ta UN aser nübur temeten atema nokdakba teloktemi Sri Lanka aija lir.
LTTE telokia tila tanurtem anioksema par tongpang raradaktsüba aser nübur alidak bomb lendong atalokdaktsüba densema, Sri Lanka sorkar anema raradang ozüng alema kanga sashia inyakba atema par telokia aija lir.
Sirisena-i aniba sorkari Tamil nisungtem den tanaben sentaktepshitsü aser samaba nisungtem bushitsü nükjidong nung office balaka tentetba aser par linük anüdoklentip tsütsü mitkartemi agiba ali nüburtem nem tanaben meyipja tesüiba mapang aibelena inyakba metongshitsü mapatong tenzükba osang jangjaogo.
Ajisüaka, Sri Lanka defense minister abensang, Sirisena-i taoba mapang LTTE telok den tongpang raradak yutsüba mitkartem tangasa meyipa maniteti lir.
Ban-i Sirisena den ajurutepba sülen LTTE teloki par tesepti ama züngshidak, Jaffna semdanga Tamil nisungtem den tsüngdong ajurutepba osanga jangjaogo.