Geneva, June 28 (Agencies): Sri Lanka-i par mitkartem azüoka taoba mapang Tamil telungpurtem den tongpang raradang ozüng alema inyakertem merenshitsü tajungshiba olen ka United Nations (UN)-i tanü, Mongolbar nü metetdaktsüogo.
“Sri Lanka-i ozüngi melaba ama, tongpang raradang ozüng alema inyakertem merenshiba ajanga nütsüng yongsük ajema alir Tamil nüburtem den tanaben sentaktepshitsü ajungshir. Ano, ozüng alema inyakba kuliser takümtem kümzüka ayutsü metetdaktsür,” ta UN High Commissioner for Human Rights, Zeid Ra’ad Al Hussein-i metetdaktsü.
Sri Lanka nungi nüchiso ngua Tamil linük balaka tentettsü meranger Tamil Tiger telungpur aser Sri Lanka mitkar na tsüngda küm 26 tashi tongpang raraba sülen kasaji 2009 küm tembang aser iba mapang telok anapronglai ozüng alema inyakba osang bushiteta lir.
Ano, 2015 küm March ita nungi tenzüka, Tir Maithripala Sirisena-i aniba Sri Lanka sorkari yimtenren temelenshi tajung bener arutsüogo saka par sorkari ozüng alema inyakertembo tanü tashi memerenshi lir.
You must be logged in to post a comment Login