Sri Lanka: Mahinda Rajapaksa-i PM menden toktsüogo

Colombo, Luchii/December 15 (Agencies): Sri Lanka nung tashi atema toktepba tembanga Mahinda Rajapaksa shiba tir Maithripala Sirisena-i Ato Kilonser asütsü shima liasü, pai Küptoknü mapa toktsüogo aser Ranil Wickremesinghe-i Amungnü iba menden belenzüktsü imlar.
Supreme Court-i telemtetba tongtiba ana agiba sülen Rajapaksa mapa nungi anen aser taoba PM-i iba menden asoshi raraba takok nguogo.
MP Shehan Semasinghe-i ashiba agi, taoba tir-i Wijerama, Colombo nung par kidang sentong ka agia pa mapa nungi anenba shidi nung sign süa liasü. “Rajapaksa-i United People’s Freedom Alliance (UPFA) MP tem dang pa mapa nungi anenba metetdakja liasü,” ta MP Semasinghe-i ashi.
Wickremesinghe mapa nungi anentsüba sülen Mongputeni/October 26 nü Tir Sirisena-i, Rajapaksa Ato Kilonser asütsü shim, iba sülen linük nung mepet mesü adoka aruogo.
Yangtepnü Supreme Court-i, Sirisena-i Parliament inyakyim anentsüba ya ozüng alema inyakba maparen ka ta sangdongogo. SC-isa, Rogonü taruba ita ken o mangadang tashi Rajapaksa-i Ato Kilonser menden mebeni atatsü tetuyuba agütsü.
Wickremesinghe indang United National Party (UNP) puri Küptoknü ashiba agi, Rogonü Sirisena den phone ajanga sensaksemba sülen pai Wickremesinghe tanaben mapa nung anioktsü asoshi mulungogo. “Amungnü onok lenir Ato Kilonser mapa asoshi tenangzüktepba agitsüba osang onoki tir secretariat nungi angazükogo,” ta UNP general secretary Akila Viraj Kariyawasam-i ashi.