Sri Lanka navy-i Tamil nunger angopur 24 apu

Rameshwaram (Tamil Nadu), October 13 (Agencies): Mongolbar nü Sri Lanka navy-i Tamil Nadu nunger angopur 24 apu aser prangpong amer angopur aika aritoka liasü.

Angopurtemji Palk Straits, Katchatheevu anasa Lanka nunger tzü nung ango apuba ajanga aritok.

Yasüng Rameswaram nungi angopur 3,000 shi rong 600 tashi nung ango aputsü asoshi apusoa liasü.

Lanka navy temji patrol rong aser sea bike 10 nung aru aser angopurtem amokmerenba den külemi parnok 24 apu aser tangartemji prangpong amer mintok, ta angopurtem tentet lenir S Emerite aser Sagayaraj nati ashi.

Angopurtemji Palk Straits, Katchatheevu anasa ango pua liasü, aser parnoki ashiba agi angopurtemji traditional tzü nung ango pua liasü.

October 10, 2015 nü Sri Lanka navy sepaitemi, International Maritime Boundary Line temzüng alema ango apur ta aija Nagapattinam district nungi angopur 19 pua liasü. Iba sülen Tamil Nadu Chief Minister Jayalalithaa-i Ato kilonser Narendra Modi dang, state nungi angopurtem tanen makai apur, anungji iba onük ya Sri Lanka den yimtenren temaba jenjang nung jembidaktsüner, ta mepishia liasü.

Ano tanga tatalokba ka nung October 02, 2015 nü Rameswaram nungi angopur aika Sri Lankan navy-i Katchatheevu islet nung pua liasü.

Angopur tentet lenir, Emirite-i, Sri Lanka navy temi angopurtem tanen makai pura angopurtem taküm alitsü atema kanga saaka akümtsü, ta ashi.

Item ama tatalokba asoshi Centre aser state sorkar napronglai nüngdakba meratem agidaktsüner, ta paisa shiogo.