Sri Lanka nung bomb pokdaktsüba atema IS-i tenüng agir

Colombo, Rongchii/April 23 (Agencies): Easter Deobarnü Sri Lanka nung tekülem kitem aser nüngtugu hotel tem nung bomb pokdokja nisung 321 tepsetba aser 500 dak tema yirutsüba maparen ya Islamic State (IS)-i inyak ta parnoki tenüng agiogo.
ISIS indang osang prokba Amaq agency ajanga sangdong ka sayaba nung, “item bomb lendong ya Islamic State sepaitem mapa lir,” ta shia lir. Ajisüaka parnoki tenüng agiba metentsü atema kuli tejangja kecha magütsü.
IS-isa ashiba agi, par litsü nung bomb pokdaktsüba linük sensotem aser Khristanpur dak tenük yoker inyak.
“US-i aniba teloktep linüktem nungi nüburtem aser Sri Lanka nung Khristanpur dak tenük yoker amakba ya Islamic State sepaitem mapa lir” ta Amaq agency-isa ashi.
Iba lendong atalokba tenüng agia sangdongba ojangtem ya taoba mapang lendong atalokdang sangdongba den mesükteper lir.
Iba lendong agütsüba ya Islamic State-i inyakba yimyatem mesüka lir, ta US intelligence osangtem ajangaa ashir.
Sri Lanka nung Junior minister for defence, Ruwan Wijewardene-i par parliament dang, Deobarnü lendong agütsüba ya Islamist telungpur telok ana- National Thawheed Jama’ut aser Jammiyathul Millathu Ibrahim – mapa lir ta shia metetdaktsü.
Tenlaki asem aser hotel pezü nung lendong ya taküm bendanga agütsür bomb apoker nisung teneti inyak.
Item lendong ya New Zealand nung March 15 nü mosque tem amakba mang ayangba liasü ta mezüng bushisüngdang ajanga yimya sayur, ta minister Wijewardene-isa ashi.
Linük nung aliba kiralongrartemi iba mapa inyaktsü asoshi international network ajanga teyari agüja alitsü akok, ta bushisüngdangertemi shir anogo ka lir, Ato Kilonser Ranil Wickremesinghe-ia parliament dang, bushisüngdangertemi bendanger teka aliba reprangteter, ta metetdaktsü.
Tang tashi nung temulung melemi bilemba nisung 40 pua lir aser item rongnung suicide bomber temi amshi ta bilemba van gari ka indang driver densema lir.
Maneni mejangjaba container truck aser van ka nung bomb bena lir ta osang kar angazüka Mongulbarnü Colombo nung police tali kümkümshia mita odar.
“Mejangjaba container truck ka aser van ka nung bomb bener Colombo tsütsüi aruogo ta” ta Colombo Harbour nung Director of Security ajanga tekümdangtsü osang ka sangoktsü.
Tang Colombo Harbour nung item gari tebushidak lir.
Easter Deobarni nü nisung 320 dak tali tepsetba asoshi linük ajungai anogo ka mang ayimba mapang ano tanü bomb bena aliba gari indang osang prokshi.