Sri Lanka nung India nunger 10 süogo: Sushma Swaraj

New Delhi, Rongchii/April 23 (Agencies): Deobarnü Sri Lanka nung kiralongrartemi tesem balala nung bomb pokdakja nisung aika tepsetba lendong nung India nungera 10 densema lir, ta India external affairs minister Sushma Swaraj-i Mongolbarnü tweet asü.
Sri Lanka bomb lendong nung asür 310 jungogo. Parnok aika iba lendong nung yiruru mozükitem nung temang anepalua aliba mapang süogo, ta police otongdar kati ashi.
“India nunger ana asüba osang sasaseta agütsür. A Maregowda aser H Puttaraju na Deobarnü Sri Lanka bomb lendong nung süogo aser tena dena tang tashi nung India nunger asür 10 jungogo,” ta Sushma Swaraj-i tweet asü.
Bomb apokba lendong nung nisung 500 shi yiru, ta police otongdar Ruwan Gunasekera-i metetdaktsü. Paisa, iba tatalokba dak sendakba nung tang tashi nung nisung 40 pua lir, koba Sir Lanka sorkari local Islamist group, National Thowheeth Jama’ath dak tonglokja liasü.
Pei temang nung bomb alenloker pokdaktsürtem bushitsü atema sorkari Mongolbarnü emergency law benokogo. Tir office ajanga emergency law ayaterem nungi benoktsü ta metetdaktsü aser iba ajanga police nem okadak nungi tetuyuba kecha makai temulung melemi bilemba nisung mashika pua ken o ashishitsü atema tashi agütsütsü. Kasa mapang nung anonung curfew benokogo.
Maneni Hombarnü linük yimtiba Colombo nung Deobarnü amakba tenlaki ka anasa bomb squad officers tem device ka defuse sütsütsü asoshi inyaktepa aliba aliba mapang nung bomb ka apokba sülen emergency law benokogo.