Sri Lanka nung Muslim nunger governor ana mapa nungi anen

Colombo, Aami/June 03 (Agencies): Sri Lanka nung Buddhist nunger monk tem timba densema nisung meyirejang aikati Kandy yimti nung longkak aita nokdakba sülen Hombarnü Muslim nunger governor ana mapa nungi anenogo. Easter anogo lendong adokdaktsüba telok busemba atema tena mapa nungi agientsü asoshi nüburtemi khanga liasü.
Western Province Governor Azath Salley aser Eastern Province Governor MALM Hisbullah nati Tir Maithripala Sirisena nem resignation letter agütsüogo, ta ketdangsertemi metetdaktsü.
Salley aser Hisbullah naprongla ya Muslim nunger lir aser tenaprongla ya Sirisena-i shim. Extremism tem den sendaktepa lir ta temulung melemi bilemba ajanga tena mapa nungi anentsü asoshi nongshia aruogo. Ajisüaka tenapronglai iba taitsüba ya tai ta shiogo.
Iba tatalokba ya ISIS den sendaktepa aliba local Islamist group National Thowheeth Jamaath (NTJ) puri Easter Sunday nü lendong bener arutsüba den sendaktepa lir. Buddhist monk Athuraliye Rathana, shiba Sirisena’er party den sendaktepa aliba party ka nungi parliament züngsem ka lir pa anogo pezü tashi Kandy yimti nung lumia longkak aitba sülen Governor ana mapa nungi anen. “Tir-i Muslim nunger governor ana mapa nungi anentsüba sülenang ni lumia longkak aitba anentsü,” ta Rathana-i longkak ait tenzükba mapang ashi.
Buddhists nunger 10,000 shi-i Hombarnü ‘Temple of Tooth’ nung anepdang Muslim nunger anema yimyim ayima longkak ait. Monk Galagodaaththe Gnanasara shiba taoba ita tir-i tatok agüja chiok, paa iba sentong nung dena liasü. Gnanasara ya Muslims nunger anema nokdakba atema aija aruogo. Kasa mapang nung Colombo nung Catholic Arogotem tekolakba Cardinal Malcolm Ranjith-a Hombarnü Kandy-i oa Rathana den ajurutepogo. Iba yimti nung dokan aser office ajak shibangadok aser Rathana busema wako tanak songer parnoki longkak ait.
April 21 nü lendong atalokba sülen Muslim nunger yimsüsürtem aija arudar. Parnoki Muslim nunger telungpur renloka aoba nung teyari agütsür ta aija arudar. Industry and Commerce Minister Rishath Bathiyutheen bo NTJ busemba atema indang indanga aitsüogo. Kasa mapang nung Opposition-i Bathiyutheen anema Parliament nung motion of no confidence ka benok, shibai NTJ den pa sendaka mali ta shiogo.
Sorkar kübok Muslim nunger yimten yimsüsürtemi, sorkari nütsüng agi ajema aliba Muslim nungertem kümzüka meyuteter ta shia iba ya anemtsü asoshi mapa nungi anentsü atema asadangdar. Lendong atalokba sülen linük yimtiba north len yimti balala nung nüburtemi Muslim nunger meyong kiojen tem raksatsüogo aser iba mapang nung Muslim nunger ka tepsetba den ki, dokan aser mosque aika raksatsüogo.