Sri Lanka nung ‘state of emergency’ ozüng agütsür

Colombo, Metsüremi 06 (Agencies) : Indian Ocean nung yangerteta aliba asetkong linük Sri Lanka lima Kandy central district nung Buddhist yimsü amangertem o Muslim nungertem tsüngda raratep adokba sülen tashiyim maparen nokdangtsü atema Sri Lanka sorkari anogo ter ‘state of emergency’ alitsü sangdongogo.
Emergency ozüng agüjaka India, Sri Lanka aser Bangladesh tsüngda asayatsü aliba cricket asayamong, Nidahas Trophy tanü Sangtennü nungi tenzüka asayadagi.
Küm ka tejaklen yimsü balala amanger telok ana tsüngda mangatettep adoktsü tenzük; mezüngbubaji tashiyim amshia Islam yimsü agizükdaktsütsü meranger ta Buddhist yimsü retreta amanger kari Muslim nungertem aitsüba nungi tenzük.
Ano Myanmar nungi aruba Rohingya nunger Muslim yimsü amangertem Sri Lanka nung jenoktsü merangba anema Buddhist nungertemi nokdak. “Special cabinet senden ka mena, linük tesem tangaleni raratepba ya menaloktepa modaktsütsü mechi anogo 10 emergency sangdongtsü sorkari telemtetba agiogo,” ta Reuters osang den jembidang otongdar, Dayasiri Jayasekara-i metetdaktsü.
Telok ka adenshir Muslim nungeri lapokba dokan ka nung mi senoktsüba sülen sorkari Kandy nung elite police aser tanga sepaitem yoka lir aser majority Sinhalese Buddhists o minority Muslim nungertem tsüngda raratep madokdaktsütsü asoshi Kandy nung curfew ozüng agütsüogo.