Sri Lanka nung temelenshi bener arütsür monk ka asü

Colombo, November 08 (Agencies): Deobarnü Sri Lanka nung linük nung temelenshi bener arütsür monk ka süogo. Pai linük nung sorkar melenshitsü inyakyim nung tongti shilem agia liasü.
Singapore nung temang yaria lia monk, Maduluwawe Sobitha Deobarnü asüba tenüng nung linük rangben sodi agitsü asoshi Sri Lanka sorkari sangdongogo, ta Xinhua news agency ajanga metetdaktsü.
Maduluwawe Sobitha-i taoba küm sorkar aser Tir Mahinda Rajapaksa melena Tir tasen ka shimtsü asoshi inyakyim tasen ka tenzük aser idangji tang aliba Tir Maithripala Sirisena ya nüburtemi kanga pusema liasü.
Sobitha-isa, tesüiba mapang tang nungi Tir ka tashi tajemba akümtsü asoshi linük temzüngtem yanglushitsü ajungshia liasü aser iba temebishiba junger ta, tang aliba Tir Sirisena mulunga agizükba sülen January ita election nung toktepa takok angu.
Maduluwawe Sobitha den asüpila sentong linük nüburtem ajak lia parliament house anasa Brihostibar nü agitsü, ta sorkari metetdaktsüogo.
Tir Maithripala Sirisena-i, Maduluwawe Sobitha iba lima nungi pilaba osang angashi temulung kanga raksar, ta ashi dang, pa atema tetushi tulutibaji Sri Lanka atema pa nükla ataloktsüba ajanga dang peritettsü, ta shisem.