Sri Lanka o Malaysia na tesendaktep tajungba kümdaktsütsü azüngashir

Sri Lanka Tir, Maithripala Sirisen (Tesülen, Abelen) aser Malaysia Ato Kilonser, Datuk Seri Najib Razak (Tesülen, Achijilen) nati repranga lia, Sri Lanka’er Foreign Employment Deputy Minister, Manusha Nanayakkara aser Malaysia’er Human Resources Minister, Richard Riot Jaem nati par Sri Lanka aser Malaysia na tenüng nung Memoranda of Understanding (MoU) 5 tashi Malaysia yimtiba, Kuala Lumpur nung zülutepa agiba noksa nung angur. (Kuala Lumpur, December 17)

Kuala Lumpur, December 17 (Agencies): Sri Lanka aser Malaysia linük na tsüngda tesendaktep taoba mapang den tajungba kümdaktsütsü tezüngzüktep ka Sri Lanka Tir, Maithripala Sirisena aser Malaysia Ato Kilonser, Mohammad Najib Tun Abdul Razak nati tanü, Honibar nü agiogo.
Tan tezüngzüktep agiba sülen par linük anati yimtenren, shishilembatsü, kaketshisatsü bushitsü, raliwalitsüren aser sobaliba densemba, tongti sabang balala nung amalitepa inyakteptsü nangzüker lir.
Razak-i jaokba onük agizüka, Sirisena-i tan December ita 15-17 nü tashi Malaysia semdang aser tan semdangba sentong agidang lenir anati tongti tezüngzüktepji agi.
Tenati par linük ana tsüngda tesendaktep tajungba kümdaktsütsü onük benoka jembiba den par linük anati aroki lungjemer regional aser international sabang aser ken o balala nung aroki lungjemer inyaktsü bangjema liasü.
Sri Lanka nung nüburtem ajunga ka küma lungjemdaktsütsü, linük temzüng tajungba küma melenshitsü aser rongsenren terenlok lidaktsütsü atema National Unity Government (NUG)-i inyakba osang kar Sirisena-i Razak den lemsatepba osanga angazükogo.
NUG-i par yimsüsütsüren takok ngua inyakba atema pela olen ka lemsatepba den külemi, par Malaysia sorkari NUG pusema nungitsü renemba olen ka Razak-ia metetdaktsü.
United Nations (UN) Charter aser alima temzüng ozüngi melaba ama par linük anapronglai inyaktsü ajungshitepba den alima jenjang nung adokba mangatetep keno ajunga yimjung sentong ayonga jembitepba ajanga dang bentettettsü ta lenir anati bangjema agizük.
Par linük ana tsüngda zülutepa agiba Memoranda of Understanding (MoU) 5 – Tourism Related Activities; Cooperation in The Field of Youth Development; Recruitment, Employment & Repatriation of Workers; Field of Culuture, Arts & Heritage aser Sri Lanka Council For Agricultural Research Policy (SLCARP) o Malaysian Agricultural Research & Development Institute (MARDI) na tsüngda Scientific Research & Technical Cooperation alitsü MoU zülutepa agiba sentong nunga Sirisena o Razak nati shilem agia liasü.