Sri Lanka spinner Herath T20 aser ODI nung anisüngzüker

Colombo, April 17 (Agencies) : Sri Lanka nungi nüngtugu cricket ball spinner tejen, Rangana Herath-i pa T20 aser One-Day International (ODI) asaya nungi anisüngzüker ta Deobarnü metetdaktsüogo.
Herath-i Sri Lanka Cricket dangi züluba shiti nung shia aliba agi, Test cricket ya pai kanga meimer aser iba asaya nung temulung bendanga agüja asayaner.
“Cricket asayar ajak mapang tetemsü tongerbo anisüngzüktsü. Tang ya ni asoshi mapang tetemsü ama ni bilemer. Joko 2019 küm asayatsü aliba World Cup nükla nung tang yongi lanurtem aniteta atatsü mapang tajung lir,” ta pai ashi.
2014 küm Pakistan team den Test asayaba mapang Herath-i wicket 9 agia liasü aser ibaji pai ball aondang wicket timtiba agiba lir. 2013 küm India den T20I asayadang wicket 4, 2014 küm New Zealand den T20 asayadang wicket 5 agia liasü.
Herath-i over ka aondang ball tapu balala aika onteter aser ibaji ajanga Sri Lanka team nung pa-a tongti bowler ka liasü.
Pa cricket asaya aruba mapang Tests 67 ben asaya aser idangji wicket 297 agi. ODI 71 ben asayadang wicket 74 agiogo aser T20 Internationals 17 ben sayaba nung wicket 18 agi.
Herath-i, “Ni kolenisa odir oaka teti kasa alir. Ni ball aondang batsman tem out südaktsüner,” ta ashi.
Sri Lanka Cricket-i Herath nem tenüngsang agütsüba mapang pai meimba Test cricket asayadang takok ma nung asaya ang ta ashi.