Sri Lanka Tests atema New Zealand-i spinner 4 shimogo

Chiteni/July 29, 2019 (Agencies): Küm anashi lir külen Mitchell Santner Sri Lanka den asayatsü atema New Zealand Test squad nung maneni aniokogo. Iba asayamung atema New Zealand-i spiner pezü aniokogo.
Spinning allrounder Santner, leg-spinner Todd Astle, off-spinner Will Somerville aser left-armer Ajaz Patel nunger den külemi squad nung aniokogo. Parnok Galle nung August 14 nü mezüngbuba Test asayatsü aser August 22 nü Colombo nung tanabuba Test asayatsü.
Santner, shiba tatemsa 2017 küm December ita West Indies den asayaogo, pa temokok yiruba ajanga taoba küm junga masayateti aruogo.
Pa ya New Zealand nunger asayar rongnung white ball spinner tajungtiba ta züngshir. Pai tang tashi nung wicket 69 agia lir saka Test asaya nungbo kanga jungrarabo masayai arudar. Pai Test asaya 27 nung wicket 34 agia lir.
Taoba küm December ita Dubai nung Pakistan den mezüngbuba Test asaya nung wicket 7 agiba sülen Somerville Test ka nung danga asayaa mali, aser kasa mapang nung Astle küm tenet tejakdang mezüngbuba Test nung asaya saka tang tashi nung pa Test pezü nung dang asayaa lir.
Squad nung fast bowler asem anioka lir; Bowler tem rongnung Trent Boult, Tim Southee aser Neil Wagner densema lir.
New Zealand World Cup team nungi asayar teku maneni iba asayamung nung shilem agitsü asoshi shimogo saka leg-spinner Ish Sodhi aser seamer Matt Henry na meshim.
New Zealand squad: Kane Williamson (captain), Tom Latham, Jeet Raval, Ross Taylor, Henry Nicholls, B.J. Watling, Tom Blundell, Colin de Grandhomme, Mitchell Santner, Todd Astle, Will Somerville, Tim Southee, Neil Wagner, Trent Boult, Ajaz Patel.