Sri Lanka yangerba nung India-i yaritsü: PM Modi

Colombo (Sri Lanka), May 12 (Agencies): Tanü Ato kilonser, Narendra Modi-i Sri Lanka dang, ner linük yangerba nung India-i yaritsü; New Delhi ji nenok tembar aser partner ka asütsü, ta metetdaktsü.
Tanü Sri Lanka yimtiba, Colombo nung Buddhist nunger tongti benjung, International Vesak Day sentong nung jembidang Modi-i, “Asen tesem nungi alima nem Buddha aser pa tesayubatem sempet agütsüogo,” ta ashi.
Modi-isa, India aser Sri Lanka na tesendaktep tajungba akumtsü atema tang maongka lir, ta metetdaktsü.
“Kidanger ama lenla aika nung asenok tesendaktep lir,” ta pai ashi.
“Nenoki India ji, ner linük yangerba nungiter tembar ka aser partner ka ta jangjatsü,” ta paisa shisem.
“India maneni ainba ajanga tesem (South Asia linüktem) ajak ajangzüktsü, talisa Sri Lanka ajangzüktsü,” ta pai ashi.
Tesülen Sri Lankan tea industry nung inyaker Tamil nunger den jembidang Modi-i, Central Lanka nung Tamil nunger taküm jenjang ajungkettsütsü atema Sri Lanka-i agiba mera ajak nung India-i nungittsü,” ta ashi.
Tanü Modi-isa Sri Lankan kübok Nuwara Eliya district nung Hatton Dickoya Base Hospital semzükja liasü. Iba hospital yanglutsü atema India-i senotsü agi yaria liasü.
Yipten 150 aliba multi-specialty hospital yanglutsü atema India sorkari sen billion 1.2 shi agüja liasü.