Sri Lanka yimsüsürtemi RTI bill agizüker

Colombo, June 24 (Agencies): Sri Lanka yimsüsürtemi Right to Information (RTI) onük ozüng küma tanü, Hokolbar nü agizükogo.

Ochimashi aser ozüng alema inyakba maparen agi asüngba Sri Lanka nung sorkar aser yimsüsür inyakyim ajunga nüburtem nem metetdaktsütsü aser yamaji inyakba ajanga par yimsü asütsüren jenjang tajungba kümdaktsütsü nükjidong nung par yimsüsürtemi tan RTI ya ozüng küma agizüker lir.

Züngsem 225 züngsemba parliament yimsüsürtemi anogo 2 tashi olemtepba sülen RTI onükji tanü ozüng küma agizüka liasü.

Tan RTI ozüng küma agizükba sülen Sri Lanka nüburtem nem linük aser kija nisungtem nem lendong bener arütsütsü osangtsüsang dak alaka, tetsükdakba kecha meli osangtsüsang agütsütsü lenmang sadema lapoktsür lir.

Tan agizükba RTI ozüng ya mapa küma benshidaktsütsü asoshi züngsem 5 densemba RTI Commission ka tentetogo.

RTI onük ya mezüngbo 1996 küm benok saka idangji Tamil telungpur den sentakba timtem ajurua aliba yong RTI onük ya tanü ang ozüng küma agizüker lir.