Sri Lankan Ato kilonser, Rajapaksa-i Feb 7-11 nung India semdangtsü: MEA

New Delhi, January 31 (Agencies): February 7-11, 2020 anogotem nung Sri Lanka Ato kilonser, Mahinda Rajapaksa-i India semdangtsü, ta Ministry of External Affairs (MEA) otongdar, Raveesh Kumar-i metetdaktsü.
February 7, 2020 nü pa India-i aruba sülen pa leniba nung ketdangsertemi Ato kilonser, Narendra Modi den senden ka amentsü. Delhi nung nüngdak ajak atemba sülen pa Uttar Pradesh kübok Varanasi aser Sarnath na, Bihar nung Bodhgaya aser Andhra Pradesh nung Tirupati-i aotsü sentong lir.
South Asian Association for Regional Cooperation (SAARC) züngsem linüktem den India tesendaktep lemsatepdang Kumar-i, India-i linük ka (Pakistan) dak alaka item linük ajak den tesendaktep tajung ayur, ta ashi.
Pakistan tenüng metetshii pai, “Arrtsülen nungi kiralongraba ajanga Regional tsüngda amalitep jenjang raksar, ta ashi.
SAARC züngsem linüktemji Afghanistan, Bangladesh, Bhutan, India, Maldives, Nepal, Pakistan aser Sri Lanka lir.
Tang Coronavirus tashidak agi kongshir aliba linük, China nung alir India nunger dak sendakba nung Kumar-i, “Onoki tanen makai tensa asadangdar. Onoki China kübok Hubei province nungi India nunger anir arütsü atema tayimtsü ana senzütsü atema temelaba meshiogo, aser China dang nungi telangzüba atadar. Yangji asen senso kaketshir 1200 shi lir aser parnok rongnungi nisung 600 denbo onoki tongtepratepa China nungi meyipa aruner asü ta asüngdangogo,” ta metetdaktsü.