Sri Sri den Kashmir tensa atema jembiogo: Burhan Wani tebu

Srinagar, August 28 (Agencies): July ita tetenzüklen Kashmir nung sepaitemi kahsetsang, Hizbul Mujahideen commander Burhan Wani tebu-i Bengaluru-i oa Art of Living tentetsang, Sri Sri Ravi Shankar ajurua Kashmir tensa indang jembiogo.
South Kashmir, Tral jila nungi phone ajanga osangbenertem den jembidang Muzaffar Wani-i, “Taoba hopta Bengaluru semdangdang ni Sri Sri Ravi Shankar ajuruogo. Sri Sri ya yimjung nisung lir, aser ni pa dang tensa indang osang metetdaktsüogo,” ta ashi.
Wani’er jabaso Burhan tepsetba sülen Kashmir nung rara adoka tanü agi anogo 51buba tashi nung nisung 68 tashi süogo.
Wani-isa, pai Sri Sri dang Kashmir tebilemtsü atema lenmang ka bushitsü asoshi inyakang ta mepoishiogo, ta ashi.
Wani-i, “Sri Sri-i kü dang Kashmir nüburtemi kechi aginer ta asüngdang. Ni pa dang ibaji metettsü atema nai Valley semdangtsüla ta shiogo.”
Wani ya tesayur ka lir, aser pai, Kashmir tebilemtsü onük teti atema bentettsü asoshi Separitist den telatetba kecha makai ken o jembitsüla, ta ashi.
“Kashmir atema lenirji Hurriyat lir aser telatetba kecha makai ken o jembitsüla. India Temzüng kübok telatetba yur jembiba ajanga iba tebilemtsü makoktsü,” ta paisa ashi.
Burhan tebu Wani ya temang anepalutsü atema Brihostibarnü Bengaluru-i oa liasü aser yashi kidangi shilang.
Wani-i, pa diabetes timtem anepalutsü atema Bengaluru-i oa Sri Sri Ayurvedic hospital nung anepalu, ta ashi.
“Ni hotel nung manenzük, kechiyong ibaji kü taküm atema lendong lir ama ni bilem. Ni Ashram (Sri Sri indang Ashram) nung ang anenzük,” ta pai ashi.
Tesülen Sri Sri-i twitter ajanga, “Burhan Wani tebu, Muzaffar Wani anogo ananü ashram nung mungogo. Künati onük aika nung o lemtep,” ta ashi.
Wani’er jabaso tambusang, Khalid-a yaküm April ita nung security sepaitemi tepseta liasü.