Sridevi den külemi shilem agiba Adil Hussain-i lemsatep

Guwahati, Tsüklai/February 21 (Agencies): Nüngtugo Bollywood actress asür Sridevi, la sür küm ka ajungtsü atema anogo asem lia, la den külemi ‘English Vinglish’ film nung shilem agisang actor Adil Hussain-i iba movie set nung Sridevi den mezüng ajurua shilem agiba otsütem bilemtetba pai lemsatepa liasü.
Taoba küm February 24, 2018 nü actress mongin Sridevi, Dubai kübok la anenba hotel takdang indang bath tub nung tzü agi araksetba sülen la süadok, ta osangtem ajanga metetdakja liasü.
Interview ka agiba mapang, ‘English Vinglish’ film nung Sridevi den külemi shilem agisang aser Assam nunger Adil Hussain, pai iba film set nung Sridevi mezüng ajurua shilem agiba mapang la dak temeimtsü jakla aser sempet tajung aliba ajitetta pa kanga dang peladokba indang lemsatepogo.
Nüburtemi tenüngsang agüja jembiba actor Adil-i, Sridevi asüba osang ajanga linük anokshitsüba dang masü saka pa dena kanga dang aoksadokba indang ashi.
Actor Hussain ya Assam kübok Goalpara District nungi lir, pai film atema Sridevi den set nung inyakdang tajangshiba tasen ngua aser angazükba tem bilemtetta liasü.
“Film ka nung Sridevi den külemi kü nem shilem agidaktsütsü ta angazükba mapang anogo aika atema ni temulung melutetti arentaka bilema liasü. Ni Sridevi indang film tem aika reprangogo aser la fan ka liasü. Film nung shilem tajung agiba den külemi la dak ochishiba jakla keta liasü,” ta Adil-i ashi.