Srijit indang film nung Supriyo-i tongti shilem agitsü

Metsüremi/March 8, 2019 (Agencies): National Award ngur alisang film yanglur Srijit Mukherji-i Brehostibarnü, kentener aliba nungi politician akümsang Babul Supriyo-i pa indang taruba film Gumnami nung shilem agitsüba sangdongogo. Iba film ya Netaji Subhas Chandra Bose indang taküm otsü nung ajemdaker yanglutsü.
1970s aser ’80s mapang Hindu sant ka ama Faizabad, Uttar Pradesh nung alisang dang ya ‘Gumnami Baba’ ta jaa liasü. Pa ajurur temi pa ya Subhas Chandra Bose ta ashir, shiba 1945 küm tayimtsü nung tsükoka asü ta jembir saka iba osang aikati mamanger.
Supriyo-i taoba mapang Bengali film; Shah Jahan Regency, Chander Bari aser Uma nunger nung shilem agiogo.
“Tembar @SuPriyoBabul’er kidang jangradema chiajema kazüogo. Uma aser Shah Jahan Regency ama pa ya Gumnaami film nung kanga tongtiba lir aser pa indang capacity yakta jangjatsü,” ta Mukherji-i Twitter nung zülutsü.
Mukherji-i pa ajungbena semdangba indang jembidang BJP lenir aser Union Minister-i tena tangokba noksa ka lemsatepa liasü.
Taoba mapang nung Bose indang grand nephew Chandra Kumar Bose-i ashiba agi, documentary mesera photographic evidence kecha melei Netaji dang “Gumnami Baba” ta ajatsü ya “criminal offence” ka lir.
Iba sülen Mukherji-i ashiba agi, “nai ni amokmerenba dak sendakba nung, ni kü linük nungsa alitsü aser iba film ya yanglutsü. Nai ni okadaki anir ora ni okadak nungi iba film atema production design ideas agitsü. Nai ni tepuokdaki idaktsüra ni script nung draft kar zülutsü.”