Srikanth-i takok angu, Saina tsükogo

London, Metsüremi 14 (Agencies): Birmingham nung All England Open Badminton Championship asayamung tebur kija asaya ka nung India nunger Kidambi Srikanth-i takok ngua tanabuba round tongtetogo. Rasemnü (Wednesday) iba asaya mezüngbuba round nung Srikanth-i France nunger Brice Leverdez madak takok angu.
Iba asayamung nung tetsür kija mezüngbuba round asaya ka nung India tsür Sania Nehwal-i World No. 1 nung alila, Tai Tzu-Ying den tamakok anogu.
Tebur mezüngbuba round asaya nung Srikanth-i kanga dang saka Leverdez den asaya 7-21, 21-14, 22-20 agi takok ngutet. Iba asaya ghonda ka jungna nung tembanga liasü.
Seed asembuba nung alisang aser Super Series ‘title’ pezüben koka alisang, Srikanth-i mezüngbuba asaya nung Leverdez den tamakok angu. Mezüng asaya nung Srikanth-i aiben aibelenba ajanga Leverdez point 5-0 agi tejaklen liasü. Leverdez-i maneni tajungba nung asaya 21-7 ngua tembang.
Tanabuba set nung Srikanth-i asayaba yimyatem melenshia asaya aser breakpoint 11-5 agi ani. Pai maneni iba sempet tajung bener asaya point 21-14 agi tanabuba set koktet.
Iba asayamung tetsür kija asaya ka nung India tsür Sania ya kanga meranga asaya, saka la ya 14-21, 18-21 agi Ying-i tsükdaktsü. Tena tsüngta iba asaya minute 38 nung tembang.
Maneni tetsür tarep asaya mezüngbuba round nung India tsür Meghana Jakkampudi aser Poorvisha Ram na seed pungobuba nung alir Japan tsür, Shiho Tanaka aser Koharu Yonemoto den 14-21, 11-21 agi tamakok nguogo.
Tetsür tarep mezüngbuba round asaya ka nungsa India tsür Ashwini Ponappa aser Sikki Reddy na tanabuba seed nung alir Japan tsür, Misaki Matsutomo aser Ayaka Takahashi nadi 14-21, 13-21 agi tsükdaktsü.