Srikanth Syed Modi Grand Prix quarterfinal tongogo

Lucknow, January 28 (Agencies): India nunger badminton asayar, Kidambi Srikanth aser defending champion, Parupalli Kashyap nati takok ngua Syed Modi Grand Prix asayamong tebur singles shilem indang quarterfinal asayatsü jenjang tanü, Brehostibar nü ajangzükogo.
Tan asayamong nung temaba jenjang abensang, Srikanth-i tanü minute 32 nung points 21-9, 21-12 ngua Malaysia nunger Iskandar Zulkarnain Zainuddin tsükdaktsü.
Tebur World No. 9, Srikanth-i Malaysia nungersa, Goh Soon Huat den quarterfinal nung ajuruteptsü.
Parupalli Kashyap-ia points 21-19 21-10 agi China nunger Zhu Siyuan madak takok anguba sülen maneni China nunger tanga ka, Huang Yuxiang den quarterfinal asayatsü lemzükogo.
Ajisüaka, tawa Malaysia Open takok marok agizükla, PV Sindhu-i tanü tamakok ajurua tan asayamong nung joko shilem magitettsüsa jenjang tamajung ajuruogo.
Thailand tsür, Nitchaon Jindapol-i tanü ghonda 1 ser minute 28 nung points 18-21, 26-24 21-17 ngua Sindhu tetsür singles tanabuba round asaya nung tsükdaktsü.
Tetsür doubles asayar, Jwala Gutta o Ashwini Ponnappa natia tanü points 21-9 21-10 ngua külem senotsür, Ningshi Block Hazarika o Harika Veludurthi na tsükdaktsüba sülen Thailand tsür, Puttita Supajirakul o Sapsiree Taerattanachai na den taruba asaya nung ajuruteptsü jenjang nguogo.