Srinagar by-election anogo nung nisung 6 asü

Srinagar, April 09, 2017: Deobarnü Jammu & Kashmir, Srinagar nung Srinagar Lok Sabha menden atema by election agiba anogo nung longkak aitertemi security sepaitem dak long agi aonba noksa nung angur. 

Srinagar/New Delhi, April 09 (Agencies): Deobarnü Srinagar Lok Sabha menden atema by-election nung vote shilem 6.5 dang agüja liasü.
Tesem aika nung rara adokba ajanga vote shilem 6.5 dang agütsü, ta Jammu & Kashmir Chief Electoral Officer, Shantanu-i osangbenertem dang ashi. Paisa, iba rara nung security sepai 100 dak tali yiruogo, ta ashi.
Polling station kwi nung election agishitsü ?, ta asüngdangba langzüdang Shantanu-i, polling station 50 nungi 100 tsüngda nungbosa election agishitsü, ta ashi.
Tanü Srinagar Lok Sabha menden kübok aliba Budgam district nung longkak aitertem aser sepaitem tsüngda raradang nisung trok süogo.
Osang angazükba agi, Srinagar tesem balala nung raradang security sepaitemi injang kahloktsüba ajanga nisung pezü asü.
Srinagar constituency kübok Ganderbal district nung longkak aitertemi sepaitem dak long aser petrol bomb onloktsüba ajanga security sepai yarisemtsü atema army teyari meshia liasü.
Longkak aiter nisung 100 shi dak tema Budgam kübok aliba Pakherpora nung polling station kati aoba sülen polling booth aliba kiji raksatsü. Iba sülen sepaitemi longkak aitertem senshidaktsütsü atema anünglen injang aika kahdok saka longkak aitertemi taliba longkak aita liasü.
Iba sülen sepaitemi injang yokdang nisung trok yirutsü aser tesülen parnok rongnung nisung anabo asü. Asür anaji arishi küm 20, Mohammad Abbas aser Faizaan Ahmad (15) na liasü.
Budgam tesem aika nung Polling station aser EVMs raksatsüba sülen election agiba tembanga liasü, ajisüaka Kangan aser Ganderbal nungbo election sünepa agiogo.
Srinagar menden nung densema aliba district asem- Srinagar, Budgam aser Ganderbal kübok tesem aika nunga rara adoka liasü, ta ketdangsertemi ashi.
State nung nisung trok asüba anema Separatist temi Hombar nungi tenzüka anogo ananü longkak aittsü ayongzükogo.