Srinagar nung DSP Mohammad Ayoub Pandith long agi onset

Srinagar, June 23 (Agencies): Srinagar nung Jamia Masjid kima loktii Deputy Superintendent of Police ka süoshi ajak semzüktsür long agi onsetba sülen state Chief Minister, Mehbooba Mufti aser separatist Hurriyat lenir, Mirwaiz Umar Farooq densema lenir aikati iba tatalokba aitsüogo.
Iba tatalokba ya taaktsüka lir, ta shia Chief Minister-i, sepaitemi kobika aremzüktsü, sepaitemi maremzüktetra takoksa alitsü, ta metetdaktsü.
Srinagar yimti tejenba kübok Nowhatta tesem nung aliba Masjid nung Hokolbarnü sarasadem sülen sayutsüngir, Mirwaiz-ia, iba tatalokba ya onok yimsü alema lir, ta aitsü.
Tanü 12:30 ako meta DSP Mohammad Ayoub Pandith-i Muslim nunger tekülem kidang nungi adokertem noksa tangokba sülen loktii pa amak, aser pai-a pistol agi nisung asem yirutsü ta osang angazüker, ta police osang ajanga ashi.
“Hokolbarnü sarasadem sülen tensa meraksatsü atema lokti azüoktsü asoshi DSP nem iba tesem nungji mapa lemzükja liasü,” ta Director General of Police, SP Vaid-i ashi.
Paisa, “Masjid mita reprangba sülen iba telung nungjagi adokdang nisung tamajunger kari pa puiter pa dak azük,” ta ashi.
Vaid-i ashiba agi, iba tatalokba dak sendakba nung tang tashi nung nisung ana pua lir, aser nisung tasembubajia jangjaogo.
“Parnok ajak nisung tepsetba nungji densema lir, aser parnok obendangtsü,” ta paisa metetdaktsü.
Mohammed-i pa kümzüktsü atema pistol amshia nisung asem yirutsüba pusema Vaid-i, “DSP ket nung pistol ka liasü, aser pa taküm kümzüktsü asoshi pa dak temeten liasü,” ta ashi.
J&K Chief Minister, Mehbooba-i, “Linük nung police force tajungtibatem rongnung J&K police densema lir. Parnok tasütait, saka parnoki pei nüburtem den inyaker ta bilema kanga azüoka tashi amshir. Saka parnoki kobika aremzüktsü? Parnoki maremzüktettsüsa anogo ka arura kanga tasak asütsü,” ta ashi.
Laisa, police ketdangserji nija mapa atema Masjid jagi aoba masü, saka nüburtem taküm kümzüktsü aser pa duty inyaktsü atema aoba liasü, ta ashi.