Srinagar nung mobile phone centre pezü amak

Kashmir, July 24, 2015: Srinagar yimti nung India police tem memetetba nisungi mobile tower amakba tesemi aoba ina noksa nung angur.

 Srinagar, July 24 (Agencies): Nübur aika mazüngi shishilembaba tesem, Karan Nagar tesem nung Aircel service centre ka mezüng memetetba nisüng kari amakba mapang, tamakertem jagi yangji inyakertem ajak meinzüka yutsür grenade ka poklokja centre nung aliba oset aika raksatsü.

Iba bomb lendong nung autorickshaw anishir ka yirua SMHS mozü kidang yaidar.

Iba bomb ji poker minute ang lir külen ano Karan Nagar tesem anasa sa telok tanga kari Vodafone service/sale centre ka nung inyaker ajak meinzüka yutsür grenade ka ki telung nung pokloktsü.

Item mapa ajanga yimti nung parnoki mobile phone shibangtsü osang agütsüba jangja jangja angateter.

Ano Chief Minister, cabinet aser state nung tulur office den state sorkar meyong office tongtibang aliba tesem, civil secretariat anasa Shaheedgunj tesem nunga BSNL tower ka nung grenade pokloktsü aser iba lendong nung civilian ka yiru.

Police-i ashiba agi lendong agütsür nisungtem aputsü asoshi maparen tenzükogo.

Tasembuba bomb poker ghonda ka jung mejung ka nung ano Wazir Bagh tesem nung aliba mobile phone tower ka nunga grenade ka pokloktsü.

Srinagar yimti nung bomb lendong iba amai atonga-atonga atalokba ya tan mezüng lir aser iba ya ajanga item lendong agütsür nisungtem yagi state yimtiba nung cell phone amshiba anentsü osang agütsür, ta jangja angateter.

Tesüiba mapang nunga North Kashmir nung aliba Sopore jila nung prangpong amer nisung kari mobile phone ayoker aser office kar maka liasü.

Tesüiba mapang Chief Minister Omar Abdullah-i, “Item lendong ya ajang Mufti Mohammad Sayeed kümküma alitsü ajungmesor aser ya pungba pungba magitsüla kechiba süra Srinagar ya Sopore jila den saku masü,” ta ashi.

Muzaffarabad nungi telungpur tekolak Syed Salahuddin-i lendong agutsüba nung Separatists temi kecha süoki mayir aser parnoki item telok dang Kashimir tsükchirtem, ta ajar.

Sallahuddin-i Brihostibar nü Hizbul Mujahiddin telok nungi Najar anendaktsüba sangdong ka ajanga metetdakja liasü. Kashimir tenemtsü nung mobile phone tower tem amakba ya Sallahuddin lenisüba nung inyaker, ta Police temi mulung melemi bilemer.

Hopta ana tejakdang police temi iba ama ledong agütsür nisungtem puogo, ta sangdong, saka tang tashi item nisungtemi kanga sadema lendong agüja jajar.

Iba amala lendong ya maneni yamai dang ao nungbo tetsübu agi sünga alitsü aser aji dang masü saka business nung kanga takoksa alutsü, koba mapang talang ka nunga shia marutsü.