Srinagar nung mopung kanga tatsük kümogo

Jammu/Srinagar, June 14 (Agencies) : Jammu & Kashmir indang mei yimti Srinagar nung Mongulbarnü tatsük 32 degrees tashi küma taküm atema tatsüktiba anogo otsü yangluogo. Ano tsüngküm yimti Jammu nunga tatsük 40.2 degrees tashi atu, ta met department ajanga metetdaktsü.
“Srinagar nung taküm mei mapang tatsüktibaji tanü, Mongulbarnü 32 degrees Celsius atongbaji lir. Jammu yimti nung 40.2 degrees atongbaji tanü atema tatsüktiba liasü. June 04, 2016 nüa Jammu yimti nung tatsüktibaji 43.3 degrees Celsius tashi atuba liasü,” ta tanü Mongulbarnü met department nung ketdangsertemi IANS dang ashi.
Aji oda süaka taruba gondha 24 tasüngda nung Jammu & Kashmir tesem nung tsüngsang mopung arutsü takzüteta lir.
“Tzünglu arunungbo tang kanga tsüka aliba ya terabo ajema akümtsü,” ta ketdangsertemi ashi.