SRK aser Alia Bhatt na ‘Koffee With Karan’ mezüng sentong nung shilem agitsü

New Delhi, October 27, 2016 : Hopta aika kanga yongseta ataba sülen Karan Johar-i November 6, 2016 nü tan mongpu atema pa indang ‘Koffee With Karan’ sentong nung Shah Rukh Khan aser Alia Bhatt na mezüng jaoktsü ta metetdaktsüogo.
Hopta aika iba osang tejangja angashitsü yonga aliba Shah Rukh Khan tan India atongba sülen osang tejangja metetdaktsü. Shah Rukh Khan-i Karan Johar aser ‘Dear Zindagi’ film nung pa den külemi shilem agila Alia Bhatt na den külemi studio nung tangokba noksa ka Twitter nung lemsatepogo.
Iba noksa teküpoklen pai, “Khenkhenübo mapa inyakba anogo kaji mapa masü ama amunger. Iba amala anogoji temeim aser tepela lemsatepba anogo ka ama süir. Koffe team-i ni jaokba atema kanga pelar. Tan-a iba sentong takok ma nung agi yonga oangma,” ta zülua lir.
Koffee With Karan sentong nung otsü balala jembir, pei dak atalokba otsü temai adoka ashir aser pei jangrabatem lemsateper.
Taküm Koffee With Karan sentong ya Ae Dil Hai, director, Karan atema olulu adokba shitak ataloker amai lir. Karan-i iba sentong nung pai kanga sapusang SRK melena Fawad Khan tama jaoktsü jembi saka Uri amakba sülen India aser Pakistan na meputep adoka ajanga Fawad medentettsüsa akümba agi SRK dangisa meyip ta olulu jembia liasü.
Alia-a kanga dang tia ka tang mapa ya Karan-i kanga tushia amshiba mapang ka lir. Tesüiba mapangbo pai Koffee sentong nung Kajol kanga sapua amshia liasü saka tangbo Alia Bhatt-i melenzükogo. Alia Bhatt-i ‘Ae Dil Hai Mushkil’ film nunga shilem tila ka agia lir. Asenoki SRK aser Alia na ‘Dear Zindagi’ film nung külemi shilem agiba angutsü.
Iba film ajungkettsü atema video tatsütsü ana joko adoka sayudar aser film nung tena tsüngda tesendaktep kanga tashi ita angur.
Koffee With Karan sentong nung asenoki ano ibala mesükba nisungtem aika angutsü. Karan-i iba sentong nung sempet ka agütsür aser ibaji ajanga pa inyakyim ajungba tali jungkai adoka metetdaktsütsü.
Iba sentong ya November 6, 2016 anepdang 9:00 ako nungi tenzüktsü.