SRK-i India nunger sepaitem den sangro ka lemsatep

Mumbai  October 31, 2016 : Superstar Shah Rukh Khan-i Ato Kilonser Modi-i tenzükba ‘#Sandesh2Soldiers’ inyakyim nungitba temaitsü India nunger sepaitem nüngtem nung sangro ka mejema zülutsü.
Salman Khan, Akshay Kumar aser Aamir Khan nungeri sepaitem den osang tajung lemsatepba sülen tang Shah Rukh Khan-ia Twitter nung video tatsüka dena Diwali tenüng nung sepaitem den iba sangro lemsatep. Iba sangro ji Bollywood Badshah, Shah Rukh Khan kijai züluba lir.
Pai inoktsüba video tatsüka teküpok nungji “Ajak den Diwali tepela salem lemsateper. Tesangwa benjong ajanga taküm ajak nem tesangwa aser tajung bener arujangma. Yiruyipong messüi pelatepa mongangma. Ni linük sepaitem dangi ‘#Sandesh2Soldiers’ salen yoker. Taküm Diwali mapang asenok ajaki sepaitem bilemteter!” ta zülua lir. Pai ano link ka nung pai sangro zünga tangoka ka inokja lir anungji tereprangnertemi link ji lapoka reprangtettsü.
Ano pai, “Ni parnok nem sangro tatsüka züluja lir. Amanger iba jagi parnok atongtsü,” ta tweet tanga ka nung shia lir.
Pai züluba sangroji yamai: “Asenok tetsü carpet nung, parnok tsüngsem (Boots) ali nung. Asenok anogo shia kanga süngjema alir, parnok tebilemtsü tasen agi sünga alir. Asenok aonung anisüngzüker, parnok kanga nüken belemer. Parnoki taküm bendanga agütsüba ajanga asenok taküm alir. Parnok tenüng mesangi malitsüla kechiba süra asenoki parnok okrongba bilemaka mebilemjemtsü. Parnoki raraba ajanga asenok tasü ita tashi taitba akümer. Ibai Sepai raraji lir.”
Shah Rukh-i tesüiba mapang nung TV sentong “Fauji” nung shilem agia lir aser pai iba sangro ya Instagram nunga inokja lir.