SSA tesayurtemi maneni itasen akhanger

Tura, December 22 (Agencies): SSA kübok tesayurtem nem itasen magütsüba dak sendakba nung All Garo Hills SSA School Teachers’ Association (AGHSSASTA)-i state sorkar aija, parnok itasen magütsüi aliba tekaratiba nung agütsütsü asoshi maneni khangogo.
Kasa mapang nung All Achik Youth Forum (AAYF) Assam Zone-ia parnok takhangba ya pusema nokdakogo.
AGHSSASTA puri ashiba agi, sen shilem 60 bo Centre nungi yokogo aser state sorkari agizükogo, saka sorkari parnok nem itasen agütsütsü asoshi nongnager.
“MHRD nungi itasen atema sen shilem 60 bo sanction süogo, ta onoki meteta lir, aser iba sen yagi November ita tashibo peritsü. Ajisüaka state sorkari tang tashi iba itasen onok nem magütsür,” ta AGHSSASTA, publicity secretary TD Sangma-i ashi.
Taoba mapang nung education minister Deborah Marak-i, state sorkar Centre nungi fund yoktsüba atatar, aser fund arua tongli itasen lemtsütsü, ta shia liasü. Ajisaüka tesayurtemi ashiba aser minister-i ashiba olen ya meputeper.
“Onok kanga dang tokrong tia ka nung lir, aser onoki koda kibong mesütsü aser tanurtem kaketshisatsü bushidaktsütsü asoshi atutsü. Onok tanurtem private school tem nung timba azünger aser parnok indang school fees tem magütsüba ajanga result withheld süa lir,” ta Sangma-isa ashi.
AAYF – AZ puri itasen aser arrears agütsütsü asoshi menoba atema ashishiba den sorkari tekaratiba nung tesayurtem nem parnok tangotsü tim itasen agütsütsü asoshi mepishia asüngdang.
“Tesayurtem shilen 90 bo Khristan tem lir aser parnok Christmas benjung tatonger dang lir, saka parnok ket nung sen mali koda amungtsü. Dr Mukul Sangma-i iba ken o ya angateta Christmas mapang parnok kinungertem den pelatepa amungtsüba atema senotsü karbo sa agütsütsü asoshi achaayangtsütsüla,” ta AAYF AZ tir Crossbell Marak-i ashi.
Item SSA tesayurtem nem yaküm nungi arrears aser ita pezü tashi itasen magütsüi arudar aser parnoki taoba ita ishika tejakdang nungi parnok takhangba agüja arudar, ajisüaka sorkari tang tashi parnok nem kecha telangzüba agüja mali.