SSS tenteter küm 25 ajungba jubileemong amonger

Ungma, December 10 (TYO): Tanü Brehostibar nü nungi tenzüka Ungma yimtsüng kübok Babu Tzübo Amphitheatre nung Sports Society Soyim (SSS) tenteter küm 25 ajungba jubileemong among tenzükogo.
Tanü benjungmong tenzükba sentong nung Nagaland PHED Minister, Tokheho Yeptomi tongti tesemdanger asütsü jaok saka pai mepaidoktetba timtem kar ajurua sentong nung shilem magitettsüsa akümba yong Mokokchung Additional Deputy Commissioner, Rajesh IAS-i pa melenzüka tongti tesemdanger shilem agia liasü.
“Mokokchung jila küm 125 tain akümba den sütepa SSS teloka küm 25 ajungba ya jangratemsü ka lir. SSS küm 25 tashi takokba nung anir aruba atema taoba lenirtem den tenüng agütsür. Tarutsü nung SSS teloki nungtugu asayar jenti anitettsü imlar,” ta tongti tesemdangeri metetdaktsü.
Tesülen, tongti tesemdangeri Relay Race tetoktepba tenzükja liasü.
Tan benjungmong den repsema, SSS-i ayongba volleyball asayamong nung Ungma yimtsüng nung tentetba telok 10-i shilem agiba osanga jangjaogo.
Iba asayamong tan December ita 11 nü tembangtsü aser iba sentong nung tongti tesemdanger asütsü asoshi Nagaland Rural Development & REPC Minister, C.L. John jaoka lir.
Ano külen, Yimpang aser Yimlang yimsüsür kinüngtsütemi volleyball exhibition asaya ka nung shilem agia tanü pelatepa liasü.
Saisapongtsü jangrar lanurtem anitena parnok jenjang temalen ajungkettsütsü nükla yur tentetba SSS teloki asayamong balala nung tongti shilem agiba den külemi, par telok nungi asaya balala talisa, football asaya nung state aser national jenjang tashi asayar adokogo.