SSWBT aser Tata Trust-i kaketshir 80 nem scholarship agütsü

Kohima, June 21 (TYO): Tata Trusts-i parnok Corporate Social Responsibility nung shilem ka ama Sesoma Students’ Welfare Trust (SSWBT) kübok kaketshir 80 nem sen lakh 7.6 stipend aser scholarship agütsü.
Bodbarnü Raj Bhavan nung Nagaland Angh, P B Acharya-i kaketshir 80 nem stipend aser scholarship lema agütsü.
Iba teyari ya Nagaland kübok tesem balala nungi kaketshir 80 shia nem sen 9500 agütsüba lir.
SSWBT ya Kohima district kübok Khonoma nung Sesoma kidongi tentetba lir. Yimtsüng tia nung aliba kaketshirtem aser talisa tetsürtem elementary education nung teyari agütsütsü atema parnoki iba telok tentet, ta tanü sentong nung Secretary K Seyie-i ashi.
2000 nungi SSWBT-i parnok sasep nungi kaketshirtem yaritsü tenzük saka 2016 nungi Sir Dorabji Tata Trust nungi teyari angur aser ibaji ajanga kaketshirtem nem stipend aser scholarship agütsür, ta paisa metetdaktsü.
Sentong nung Nagaland Angh, P B Acharya-i SSWBT Khonoma nem tenüngsang agütsü.
Kaketshisatsü agütsübaji tenüng atema masü saka mapa angutsü atema agütsütsüla. Kaketshisatsü ajanga tashi agütsübaji, skills renlokdaktsüba aser iba ajanga state aser linük nem tajangzük agütsüba asütsüla, ta tanü Acharya-isa ashi.
Nagaland nung petroleum aser minerals dena ali rongsen aika moaja lir, anungji lanur kaketshirtemi kaketshisatsü shitak angazüka, ochimashi medeni ali rongsen ajanga tajangzük angutsü atema merangtsüla, ta paisa ayongzük.
Sentong nung Pastor Neichüriazo Chücha-i temoatsü meshia sarasadem, Consultant RAGSH, Rovilatuo Mor-i anküp tepela o jembi aser RAGSH Chairman Vilhuria Mor-i tenüngsang agüja sarasadem.