St. Joseph Catholic University (Nagaland) Bill tatar senden nung benok

Kohima, July 12 (TYO) : Mongolbar nü Kohima nung tatar senden tenzükba mezüng anogo sentong nung Parliamentary Secretary, Higher & Technical Education, Deo Nukhu-i St. Joseph Catholic University (Nagaland) Bill, 2016 ken o lemteptsü asoshi benokogo.
Iba ken o ya Brehostibar nü tatar senden nung ken o lemteptsü agizüka yuogo.
Iba  University lapoktsüba nükjidongji  Nagaland nung private university  ajanga tanü putu dak apet aser nügdakba shisaliok agütsütsü asoshi lir. Iba Univeristy nung sayutsüba tongtibang mapatemji Accounting, Financial Analysis & Management, Business Management, Applied Sciences, Engineering & Technology, Agriculture, Architecture, Law, Education aser Medical Sciences nungertem alitsü. Iba university ya DMI Foundation Nagaland teyari ajanga lapoktsü.
Iba Univerisity lapokba ajanga Nagaland sorkar senpong nungi senotsü agütsütsü nüngdak madoktsü, kechiyong nüngdak ajak university ajanga dang reprangtsü.
Taküm 2016 küm January 7 nü Kohima nung Bishop, Most Rev. Dr. James Thoppil-i Chief Minister dangi Nagaland nung Catholic University ka lapoktsü asoshi temelaba agütsütsü mepishia zülua liasü.
Iba shidi nung Bishop-i ashiba agi, Nagaland tesem ajaklen primary nungi tenzüka college tashi nung Catholic arogotemi shisaliok tajung agütsür. Tang tashi nung Catholic arogotemi Nagaland  nung lapoka aliba school-temji primary & elementary schools 125, high schools 57 , higher secondary schools 27 , degree colleges 4, teachers’ training institute 1, B Ed College 1 aser MSW college ka lir.
Nagaland nung alir nübortem nem shisaliok tajung shitak agüja nüngdakba maparen ajak nung renloka tejakleni aotsüsa inyaktsü telemtetba aser tenangzükba tulu lir ta Kohima Bishop-isa metetdaktsü.