St. Joseph College, Jakhama nung National Seminar tenzükogo; NE renloktsü atema pei sempet, shisatsü amshitsüla: Acharya

Yimpoksüi/November 23, 2018 nü St Joseph’s College, Jakhama nung “India’s North East, A Celebration of (Indigenous) Cultures: A Phenomenological Approach” omen nung ajemdaker anogo asemnü National Seminar 2018 tenzükba sentong nung Nagaland Angh, PB Acharya-i jembiba mapang tangokba noksa nung angur.

Kohima, Yimpoksüi/November 23 (TYO): Nagaland Angh, PB Acharya-i, India maitsü balakaji nisung temeyoktep aika tejongjem nung aliba ya lir, koba ajanga loktiliba aser sobaliba balala longjemba shisangdaktsür, ta metetdaktsü, ta tanü PRO to Governor sangdong ka ajanga metetdaktsü.
Iba dak sendakba nung Angh-i ajak dang timtem maliba lima ka, adianu temeimtep aliba lima ka yangertsü aser asen linük temaba jenjangi ajungkettsütsü atema ayongzük.
November 23, 2018 nü St Joseph’s College, Jakhama nung “India’s North East, A Celebration of (Indigenous) Cultures: A Phenomenological Approach” omen nung ajemdaker anogo asemnü National Seminar 2018 tenzükba sentong nung jembidang Angh-i item o ya jembia liasü.
Acharya-i, linük den tsüngkang medema litettsüsa North East region dak tashi lir aser iba nükjidongji ataloktsü atema nüburtemi inyaktsüla, ta ayongzük.
Paisa, NE tesem nung ali nungi adokba resources aika moaja lir, aser item resources agitettsü atema shisaliok rejutemi tongtibang shilem agitsüla, ta ashi.
“Kaketshirtem aser Northeast tajangzük angutsü atema tesem nung nüngdakba skill courses tenzüktsüla; North East merenlokra India merenloktsü,” ta pai ashi.
Angh-isa, North East nung aliba nüburtem dang pei oshi aser sobaliba balala atema nüma atangtsüla aser NE renloktsü atema pei sempet den shisatsü amshitsüla, ta ashi.
Iba sentong nung Principal, St Joseph’s College, Fr Dr Sebastian Ousepparampil-i lokti pelaa agizükba o jembi aser Kohima nung Bishop, Rev. Dr James Thoppil-i onük jembia liasü.
Department of Philosophy, NEHU, Shillong nungi Prof Prasenjit Biswas-i ‘India’s North East, A Celebration of Cultures’ onük nung okila jembia liasü.
National Seminar ya November 24, 2018 tashi agitsü aser iba mapang nung linük tesem balala nung aliba Universities aser mongintemi shilem agitsü.
Iba sentong ya St Joseph’s College, Jakhama-i ayongzük aser University Grants Commission-i sponsor asü, ta kasa sangdong nung shia lir.